கருப்பு வைரத்திற்கு கவிதாஞ்சலி

 கருப்பு வைரத்திற்கு கவிதாஞ்சலி

கருமை மேனியுடை செவ்விழியோனே

நிமிர்ந்த நெஞ்சும் நேர்கொண்ட நோக்கம் உடையோனே

ஆழ்ந்த நோக்குகளால் ஆயிரம் திருப்பங்கள் தந்தோனே

வெள்ளாடை பூண்டு இதயத்தை என்றும் களங்கமின்றி

கச்சிதமாய் காத்து காலமெல்லாம் மக்களுக்கான

நேர்மைச் சேவகனாய் வாழ்ந்து கழித்தோனே

மாணவச் செல்வங்கள் கல்வியில் உச்சம் தொட

இலவசமாகவே போசிக்கும் திட்டத்தில் வெற்றி கண்டவனே

உலகம் துறக்கையில் வெறும் கையனாய் விண்ணேற்றம் கண்டு

மக்கள் மனதில் இன்றும் வாழ்பவனே அஞ்சலிகள் உனக்கு 

உண்மை விடுதலை காண்போம்

 

சர்வதேச மகளிர் தினத்தை முன்னிட்டு எழுதிய கவிவரிகள்

உண்மை விடுதலை காண்போம்

உதிரத்தால் உடல் நெய்து

மூச்சால் உயிர் ஈர்ந்து

பிறப்பெடுக்க

தன்னுயிர் பாராமல்

வழி திறந்து

சுதந்திரமாய் எங்கும்

சிறகடித்து பறக்கவிட்ட

பெண்மைக்கு 

விடுதலை கொடுத்தோம்

சுதந்திரம் கொடுத்தோம்

என்றும்

சிறகுகள் கொடுத்தோம்

என்றும் பாசாங்கு செய்து

பறக்க எத்தனிக்கையில்

கால்களில் 

இரும்புக் குண்டுகள் கொண்டு

விலங்கிட்டு

சுதந்திரத் தணிக்கை செய்து

இன்னமும் வீட்டுக்கைதிகளாய்

வைத்திருத்தல்

பெண் விடுதலையாமோ

விழித்தெழுக

உண்மை விடுதலை

காண்போம்

சிவசங்கரியின் - குவிகம் சிறுகதைத் தேர்வு – நவம்பர் 2022

 தமிழ் நாட்டு இதழ்களில் 2022, நவம்பர் மாதம் வெளிவந்து, தெரிந்தெடுக்கப்பட்ட 69 சிறுகதைகளில் எழுத்தாளர் குரு அரவிந்தனின் 'தாயகக் கனவுடன்' என்ற சிறுகதை சிறந்த கதையாகத் தெரிவாகியுள்ளது.

சிவசங்கரியின் - குவிகம் சிறுகதைத் தேர்வு – நவம்பர் 2022  

சுரேஷ் ராஜகோபால்

 

எழுத்தாளர் குரு அரவிந்தன் எழுதிய “தாயகக் கனவுடன்” – திண்ணை 27 நவம்பர் 2022  கதையை நவம்பர் மாதத்தின் சிறந்த கதையாக நான் பரிந்துரைக்கிறேன்!

நவம்பர் மாதம் 2022ல் வந்த வாராந்திர, மாதந்திர இதழ்கள் மற்றும் மின்னிதழ்களில் வந்த சிறுகதைகளில் சிறந்த கதையைத் தேர்வு செய்து கொடுக்கும் பொறுப்பை கொடுத்ததற்கு குவிகம் நிர்வாகிகளுக்கு நன்றிகள் பல.

இந்த நவம்பர் மாதம் 2022ல், 69 சிறுகதைகள் தேர்விற்கு வந்தன. இதில் எல்லாக் கதைகளிலும் ஏதாவது ஒரு சுவை அல்லது சிறப்பம்சம் இருக்கின்றன. சில கதைகள் வெகுஜன ரசனைக்கேற்ப வழக்கமான பாணியில் இருந்தன. குறையாகத் தெரியவில்லை.