இயற்கை
இயற்கையின் கோரத் தாண்டவங்கள்
மனிதம் தெரியா மனிதர்கள்
கணப்பொழுதின் விபத்துகள்
காரணம் காணாத நோய்த்தாக்கங்கள்
இவற்றால்
உருவாகியவர்கள் இவர்கள்
அவர்கள் மனம் நோகா
பெயர் வேண்டுமென
புதையல் தேடுபவர்களாய்
பல போராட்டங்கள் கடந்து
நாமம் சூட்டி மகிழ்ந்தோர்
வாழ்விற்கு ஆதாரமின்றி
வாழ்வதற்காய்
நாள்தோறும் போராடும்
இவர்களின்
எதிர் காலக்கனவுகளுக்கு
சரியான நிரந்தரப் பாதை
உருவாக்கத் தவறியவர்கள்
நாம் நாமே தான்
இவர்கள்
இந்த நிலையை
தாமே தேடியவர்களல்ல
இன்னமும்
வாழ்ந்து முடிக்கும்வரை
இவர்கள் தேடுவது
தமக்கு மட்டும்
ஏன் இந்த நிலை
இவர்களை எப்போது விளங்கிக்கொள்வோம்
நாம் சூட்டிய
“மாற்றுத் திறனாளிகள்”
நாமம் மட்டும்
இறுதிவரை இவர்களோடு கூடவே
கருத்துகள் இல்லை:
கருத்துரையிடுக