சூரரைப்போற்று இலக்குகள் இல்லாது வாழும் நபர்களுக்கு ஒரு நல்ல படிப்பினை

 

திரைப்பட விமர்சனம்

பொதுவான விபரங்கள்

தயாரிப்பு                                     : 2டி என்டர்டெயின்ட்மன்ட் மற்றும் சிக்கியா என்டர்டெயின்ட்மன்ட்

பிரதான நடிகர்கள்               : சூர்யா, அபர்ணா பாலமுரளி, ஊர்வசி மற்றும் பரேஸ் ராவல்

இயக்குனர்                                  : சுதா கொங்காரா

இசையமைப்பாளர்            : ஜி. வி. பிரகாஷ்குமார்

வெளியீட்டு திகதி                 : 12 கார்த்திகை 2020

 

அறிமுகம்

விமர்சனங்கள் அனேகமாக பல்வேறு விதமான படைப்புக்களுக்கும் பொதுவான ஒன்று. இது ஒருவகையான மீளாய்வு முறைமையே என்பது எனது அசைக்க முடியாத நம்பிக்கை. ஆய்வாளர்கள் வெவ்வேறு விதமாக தங்களது மீளாய்வை மேற்கொண்டு கருத்துக்களை முன்வைக்கின்றார்கள். ஒவ்வொரு ஆய்வாளர்களினதும் பார்வைக்கும் எதிர் பார்ப்புக்கும் ஏற்ப விமர்சனங்கள் வேறுபடுகின்றன. விமர்சனங்கள் எப்போதும் சாதக பாதக விளைவுகளைத் தோற்றுவிப்பதுண்டு. விமர்சனங்கள் வசைபாடுவதை அல்லது குற்றம் கண்டுபிடிப்பதை விடுத்து மாற்றங்கள் எவ்வாறு அமைந்தால் படைப்பாளரின் எதிர்கால படைப்புக்கள் மேலும் சிறப்பாக அமைய வழவகுக்கும் என்பதை சொல்லும்போது அது சிறந்த படைப்புக்களை வெளிக்கொணர்வதற்கு ஒரு ஊன்றுகோலாக அமையும்.

மன்மதக் கலப்பு

 மன்மதக் கலப்பு

கங்குல் மெல்ல

கவியத் தொடங்கியது

அத்தத்தின் ஊடாக

நெடுந்தூரம் பயணித்த

களைப்பு நீங்க

சிற்றில் ஒன்று கண்ணில் படவே - அக்

குரம்பையின் வாயிலில்

சகடத்தை நிறுத்தி

உள்ளே நுளைந்தனர் 

புன்னகை கமழும்

காந்த விழிகளால்

அண்ணலும் நோக்கினான்

அவளும் நோக்கினாள்

அவன் விரல் நுனிகள்

இதமான வருடல்களால்

அந்த யாழினை

மீட்ட தொடங்கியது

வதனங்கள் நெருக்கமாகி

மன்மதத்தின் அயில் பருக

அவள் அங்கமெல்லாம்

மோகம் மேலீட்டால்

அமைதியாய் நெளிந்தது

மறுகரம் அவள்

காழகம் கழைய

மன்மத அசும்பில்

புதைந்தது ஆண்மை

பொங்கியெழும் அலையாக

மோக நீர் முட்டிபோத

அடங்கியது தாகம்

அல்கள் தோறும்

இவ்வின்பம் கிடைத்திலதோ

எனும் ஏக்கம் மேலோங்க

இதனால் நான்

கவ்வைக்காளாகி விடுவேனோ

என்ற ஓர்வுக் குழப்பத்துடன்

அந்த இறுக்கப் பிணைப்பில்

உணர்வுகள் அடங்க

ஆழ்ந்த உறக்கத்தில்

அமிழ்ந்து போயினர்

அதிகாலை கண் விழிக்கையில்

உறவிகள் நீண்ட ஊர்வலமாக

சிந்திக் கிடந்த

மதன வாடை நோக்கி

 

- தமிழ் பாணன்-

சிவராசுவின் தீர்ப்பு

சிறுகதை

நேரகாலத்தோடு அமர்வுக்கு வந்ததால் அங்கு பரவலாக போடப்பட்டிருந்த அந்த நீளமான வாங்குகளில் ஒன்றில் இடம் கிடைக்க அதில் அமர்ந்துவிட்டார் சிவராசு. வந்து சேர்ந்த களைப்பு நீங்க சற்று நீண்ட மூச்சை உள்வாங்கி வெளியேற்றி தன்னை ஒரு கணம் சுதாகரித்த வண்ணம் சுற்றும் முற்றும் தனது நோட்டமிடலை ஆரம்பிக்கிறார். அமைதியான சூழலுக்குள் ஆங்காங்கே ஒரு சில குரல்கள் அடங்கலான சப்தத்தில் மென்மையான இரைச்சல் அங்கு பரவியருந்ததை உணரக்கூடியதாக இருந்தது. அங்கு அவரைச்சூழ நூற்றுக்கும் அதிகமான மக்கள். வெவ்வேறு மதம் வெவ்வேறு மொழி வித்தியாசம் தெரிகிறது. சிலர் வந்தது முதல் தாங்கள் பிடித்த ஆசனங்களில் இருந்து ஆடாமல் அசையாமல் அவதானித்துக் கொண்டு இருக்கிறார்கள். இடத்தை விட்டு நகர்ந்தால் இன்னொருவர் இடத்தைப் பிடித்துவிடுவார் என்ற பயம் அவர்களுக்கு, காரணம் இங்கே எவ்வளவு நேரம் செலவிடவேண்டி வருமோ அதுவரை அமர்ந்திருக்க வேண்டுமல்லவா. சிலர் தங்கள் விபரங்களை அங்கிருந்த கறுப்பு மேலாடை அணிந்த பிரமுகர்களுடன் சமர்பித்துக்கொண்டு இருக்கிறார்கள். ஒவ்வொருவரும் தத்தமக்கென்று வெவ்வேறு நபர்களை நியமித்திருப்பது தெளிவாக புலப்பட்டது. உள்ளே இருக்கும்போது ஒருவிதமான தயக்கமும் தாழ்மையும் சுயமாகவே சிவராசுவிடம் குடிகொண்டிருந்தது.

சிவராசுவின் தீர்ப்பு

சிறுகதை மேலே உள்ள இணைப்பை அழுத்துக

ஆறு

 

முகம் கறுத்து

அழுத வானம்

சொரிந்த

கண்ணீர்த் துளிகள்

வரைந்த

கிளைக் கோடுகள்

சங்கமித்த சந்தியில்

திரண்டு

புரண்டோடிய

வெள்ளப்பெருக்கு

கவிதை மொழி

 காதலித்தோர்க்கு

மட்டும் புரிந்த

ஒரே மொழி

அதன்

இன்பத்திலும் துன்பத்திலும்

வெற்றியிலும் தோல்வியிலும்

கவிதை மொழி

கவிதையின் உச்ச வலி

 எழுது கோல்

முனை

கவிதையின்

கடைசி வரியை

எழுதும் போது

தான்

கவிதை வலியின்

உச்சத்தை

பிரசவிக்கிறது

கண்ணீர்

 

கவலையின்

வெளிப்பாடு

பிரிவின்

புறப்பாடு

ஆனந்தத்தின்

ஈரலிப்பு

உணர்ச்சியின்

தூறல்

கோபத்தின்

பெருக்கெடுப்பு

கண்ணீர்

குருகுலத்தில் பூத்த இலக்கிய மலர் ஒன்று

பெண் இலக்கிய படைப்பாளினி பத்மா சோமகாந்தன்

அறிமுகம்

“கற்கக் கசடறக் கற்பவை கற்றபின்

நிற்க அதற்குத் தக”

எனும் வள்ளுவப் பெருந்தகையின் வாக்கிற்கொப்ப தமிழ் இலக்கிய வளர்ச்சியில் எழுத்தாளர்களாக வலம் வந்து பல படைப்புக்களை தமிழ் வளர்ச்சிக்காய் தந்த பல எழுத்தாளர்கள் பற்றி யாம் அறிவோம். இவர்களுட் பலர் இவ்வுலகை நீத்தோராகிவிட்ட அதேவேளை இன்னும் பலர் வாழும் எழுத்தாளர்களாக பல்வேறு விடயங்களை படைத்து தமிழுலகிற்கு ஈந்து கொண்டுதான் இருக்கின்றனர். இவ்வாறு படைப்புலகில் இலுக்கும் எழுத்தாளர்களுள் பலர் பெண் படைப்பாளிகாளாக மிகச்சிறந்த பல படைப்புக்களை தந்து சாதனை படைத்திருக்கிறார்கள் பலர் சாதனைகளை இன்னமும் படைத்து வருகின்றனர். தமிழ் இலக்கிய வளர்ச்சியில் சாதனை படைத்து வரும் பெண் படைப்பாளர்களுள் மிகப்பிரபல்யமான அதேவேளை தமிழ் உலகால் வியந்து பராட்டப்படும் மற்றும் கௌரவிக்கப்படும் தனித்துவமான ஒரு பெண் படைப்பாளிதான் ‘பத்மா சோமகாந்தன்’

இணைபிரியா உறவுகள்

வைகறைப் பொழுதில்

ஜன்னல் இடைவெளியில்

ஊடறுத்து என் முகம் வருடும்

இளஞ்சூட்டு ஒளிக்கீற்றுகள்

இதமாயென் காதருகில் 

ஓலைக்கீற்றுக்களின்

ஓசையொடு இசைமீட்டும்

இனிய தென்றல்

அந்த தென்றலோடு

மெல்ல மிதந்து வந்து

சுவாசத்தைப் புதுப்பிக்கும்

முன் முற்றத்து

மல்லிகையின் மலர்வாசம்

என் விசிலுக்கு

எசப்பாட்டு போடும்

வேப்பம் மரத்தடி

அணில் குஞ்சுகள்

இவர்களுடன் சேர்ந்து

தத்தித் தத்தி வந்து

பாட்டுக்கு பாட்டெடுக்கும்

சிட்டுக்களும் புனில் குஞ்சுகளும்

அழைப்புக்கு செவிசாய்த்து

ஹலோ ஹாய் சொல்லும்

தென்னம் பிள்ளையில்

கொட்டமைத்து

குஞ்சுடன் குடியிருக்கும்

செவ்வளையக் கிளிப்பிள்ளை

இருந்திருந்து கூ.. கூ... 

வெனக் கானமழைபொழியும் 

தொலை தூரத்தில்

துணையுடன் வாழும் 

குயில் அம்மா

சுற்றிச் சுற்றி என்

காலை வட்டமிட்டு

நன்றியுடன் வாலாட்டும்

என்செல்ல நாய்குட்டி

இவைகள் தான் இப்போது

என் இணை பிரியா

உறவுகள் இந்த உறவுகள்

ஒருபோதும் மனம்

மாறுவதில்லை

இன்னும் பிரசவிக்கும் வறுமையின் பிரபுக்கள்

 

வறுமை ஒழிப்பிற்கு ஒன்று

அகதிகள் புனர்வாழ்வுக்கு ஒன்று

சிறுவர் பாதுகாப்புக்கு ஒன்று

மகளிர் மேம்பாட்டுக்கு ஒன்று

வயோதிபர் உதவிக்கு ஒன்று

எயிட்ஸ் தடுப்புக்கு ஒன்று

மனித உரிமைக்கு ஒன்று

சௌக்கிய மேம்பாட்டுக்கு ஒன்று

உளநலனுக்கு ஒன்று

இளையோர் அபிவிருத்திக்கு

மேலுமொன்று

……………………

இப்படி இன்னும் எத்தனை

எத்தனை ஸ்தாபனங்கள் 

எல்லாம் இந்த

குவலயம் முழுக்க

பரந்தும் பரவியும் 

வியாபித்து கிடக்கின்றன

வறுமை ஒளிந்தபாடில்லை

அகதிகள் புனர்வாழ்வு பெறவில்லை

சிறுவர் பாதுகாப்பாய் இல்லை

மகளிர் மறுமலர்சி

கண்டதாய் இல்லை

வயோதிபரிடத்து பெரிதாய்

ஏதும் மாற்றம் கிiடாது

எயிட்ஸ் அழிந்தபாடில்லை

மனித உரிமைகள் நிலைமை

முன்னையிலும் மோசமாய்

சௌக்கிய நிறுவனங்கள்

வளர்ந்த அளவுக்கு

சௌக்கியத்தில் வளர்ச்சியில்லை

உளநல நிலைமை

தற்கொலைகள் தெரிகரிப்பில் தெரிகிறது

இளையோர் முன்னேற்றம்

வேலை தேடுவதில்

ஒவ்வொரு பிரிவிற்கும்

வருடம் தோறும் 

தின விழாக்கள் எங்கும்

அமர்க்களமாய் நடக்கிறது

ஐநாவின் பிரகடனங்கள்

காகித கதைகளாயும்

பிரபுக்களின் ஓசைகளாயும்

வருடந்தோறும் பல

கோடி மில்லியன் 

டொலர்கள் 

கரைவதில் மட்டும்

குறைவு இல்லை

இன்னும் எத்தனை

வறுமையின் பிரபுக்கள்

எதிர்காலத்தில் பிரசவிப்பரோ?....

வரலாற்றுச் சுவடுகள்

 

வரலாற்றில்
மீண்டுமோர் தடவை
கிடைத்தற் கரிய
வாய்ப்பு இந்த
ஆற்றைக் கடப்பது
இங்கு நான்
எடுத்து வைக்கும்
ஒவ்வொரு அடியும்
வரலாற்றுப் பதிவாகும்
சுவடுகளே
உள் மனசு
பேசிக்கொள்ள
பாதம் பக்குவமாய்
நகர்கிறது
மூட்டை முடிச்சுச்
சுமைகளை
தோள்களில் தாங்கியபடி

கற்பகதரு

 

பசியால வாடேக்க

வாய்க்கு ருசியான

பழமானாய்

பனங்காய்ப் பணி யாரமானாய்

களைப்பால சோரேக்க 

தலை சாய்க்க

சுருண்டு தலையணையாய் 

நீயானாய்

இரவானால் கண்ணயர

ஆளளவு பாயானாய்

தாகம் எடுக்கயில

பதநீராகி குளிர்வித்தாய்

உடலுக்கு சக்திதர

போசாக்கு மாவானாய்

ஆழ் கிணற்றில்

நீர் மொள்க

பெரிய கடகமானாய்

மாரி மழைபெய்யேக்க

நீ நனைந்து கூரையானாய்

கோடை வெயிலடிக்கேக்க

நிழல்தரும் குடையானாய்

மனை வாசல் அழகாக்க

அலங்காரப் பொருளானாய்

விலங்கினின்று பயிர்காக்க

நாற்றிசையும் வேலியானாய்

பூரணை நாள் மகிழ்சிக்கு

ஒடியற் கூழானாய்

நண்பரோட களிப்புறேக்க

சோமபான கள்ளானாய்

விழாக்கள் சோபிக்க

தொங்கு தோ ரணமானாய்

ஊரூராய் ஓடேக்க

எம்முன்னே நீ நின்று

காவல் அரணானாய்

இப்படி எங்களுக்கு 

எல்லாமாய் நீ ஆனதால

உயிர் காக்கும் பயிரானாய்

கற்பகதருவானாய்

எஸ். பி. பாலசுப்ரமணியம்

 

எஸ். பி. பாலசுப்ரமணியம்;

நீ வான் 

நிலா அல்ல 

தமிழ் இசை

மொழியின் நிலா

உன் விழிகள்

வான் வெள்ளியின்

ஒளிக்கீற்றுகள்

கவிஞன் உணர்வுகளை

குரலிசை நயத்தால்

நிஜமாக்கும் சிற்பி

நடிப்புக்கு சிவாஜி

பாடலுக்கு நீ

பாலா – ஜீ

மூச்சுக் காற்றிலே

வித்தை காட்டிய

வித்தகன்

குரல் வளத்தால்

தமிழை 

நீரோட்டமாய் அசைபோட 

வைத்த ஞானி

அந்நிய மொழிக்கு

சொந்தக்காரன்

ஆனால் தமிழின்

தவப்புதல்வன்

மொத்தத்தில் நீ

கான மழையால்

உலகம் வென்ற

சாதனைச் சிகரம்

"கம்பான்" பற்றி அறிந்துகொள்வோம்

"கம்பான்" பற்றி அறிந்துகொள்வோம் 

 கரைவலை

“கம்பான்” என்ற சொல்லை இதற்கு முன்னர் கேள்விப்பட்டிருக்கிறீர்களா. அனேகமாக இதனோடு தொடர்புபட்டவர்களுக்கு இதை தெரிந்திருப்பதற்கான வாய்ப்பு இருக்கும். ஆனால் தொடர்பற்றவர்களில் அறிஞர்கள் மற்றும் எழுத்தாளர்கள் தவிர்ந்த ஏனையோர் அறிந்திருப்பதற்கான வாய்ப்புகள் குறைவே. நான் கூட இந்த சொல்லை இதற்குமுன் கேள்விப்பட்டதில்லை. அண்மையில் தான் நான் இந்த சொல்லை அறிந்தேன். 1970ஆம் ஆண்டு வெளிவந்த ஒரு சஞ்சிகையில் கட்டுரையொன்றை படிக்கின்ற போது இந்த சொல் அதில் குறிப்பிடப்பட்டிருந்தது. நம்மில் அநேகருக்கு சொல் அகராதிகளுடன் அதிகம் பரீட்சயமில்லை. சொல் அகராதிகளுடனான பரீச்சயத்தை உருவாக்க வேண்டியதன் அவசியம் இந்த சொல்லைப் பார்த்தபோது தான் புரிந்துகொண்டேன். உண்மையிலேயே ‘கம்பான்’ என்ற சொல்லானது ஒருவகையான கயிறைக் குறிக்கிறது. அனேகமாக கடல் தொழிலில் ஈடுபடுகின்ற மீனவர்களில் ஒரு பகுதியினர் ‘கரைவலை’ என்ற வலையைப் பயன்படுத்தி மீன் பிடிப்பதில் ஈடுபடுகிறார்கள்.

சென்னையில் மேடையேறிய முதல் இலங்கைத் தமிழ் நாடகம்

சென்னையில் மேடையேறிய முதல் இலங்கைத் தமிழ் நாடகம்

ஒரு காலப்பகுதியில் மேடை நாடகங்கள் இலங்கையில் கொடிகட்டிப்பறந்தது. தென் பகுதியில் சிங்கள நாடகங்களும் வடக்கு கிழக்கில் தமிழ் நாடகங்களும் பிரபல நாடக தயாரிப்பாளர்களால் தயாரிக்கப்பட்டு சிறந்த நாடக கலைஞர்களின் பங்களிப்போடு மேடையேற்றப்பட்டு வந்தன. தென் பகுதி சிங்கள நாடகங்களுக்கு இணையாக வடக்கு கிழக்கின் தமிழ் நாடகங்களும் சளைக்காமல் உருவாகி வந்தன் அறுபதுகளில் சற்று முன்னேற்றம் கண்டிருந்த தமிழ் நாடக மேடையேற்றங்கள் காலத்துக்கு காலம் மெருகேற்றப்பட்டு நாடக பாரம்பரிய வடிவங்கள் மாற்றம் பெற்று முன்னேற்றம் கண்டு வந்தன. இந்த வகையில் முன்னேற்றம் கண்ட தமிழ் நாடகங்கள் தமது சொந்தப்பிரதேசங்களில் மாத்திரமன்றி தென் பகுதியிலும் மேடையேற்றப்பட்டன.

இவ்வாறு வடபகுதியில் நாடகக் கலையை வளர்பதில் முன்நின்று தமது பங்களிப்பை வழங்கியவர்கள் பலர் அவர்களுள் ஒருவர்தான் திரு. வாசகர் அவர்கள். பல நாடகக் கலைஞர்களை உத்வேகமளித்து உயர் நிலைக்கு கொண்டு சென்ற பெருமையில் இவரது பங்கு மிகப் பெரியது என்றால் மிகையாகாது. கலைத்துறையில் மிகுந்த ஈடுபாடுடைய சொர்ணலிங்கம் அவர்களுக்கு அடுத்த படியாக இலங்கைத் தமிழ் நாடகத்துறையின் வளர்ச்சிபற்றி அதிகம் சிந்தித்தவர்களில் கே. எம். வாசகர் முக்கியமானவர். நாடக வடிவங்களில் மாற்றம் உருவாக்கப்பட்டு எமக்கே உரிய தனித்துவாமான நாடக வடிவம் உருவாக்கப்பட வேண்டும் என்ற அவாவும் இவரிடத்தில் இருந்தது. இவரது தயாரிப்பிலும் நெறியாள்கையிலும் உருவாக்கப்பட்டதுதான் “நீ இல்லையேல்” என்ற மேடை நாடகம். கே.எம். வாசகர் அவர்களின் இந்த “நீ இல்லையேல்” என்ற மேடை நாடகமே முதன் முதலில் சென்னை மாநகரில் மேடையேற்றப்பட்ட ஈழத் தமிழ் நாடகமாகும். இந்த நாடகம் சென்னையில் மிகவும் வரவேற்பைப் பெற்றமையும் குறிப்பிடத்தக்கது.  அத்தோடு வாசகர் அவர்களால் தயாரித்து நெறியாழ்கை செய்யப்பட்ட இந்த நாடகம் சிங்கள மொழியில் “ ஒப நத்னம்” என்ற பெயரில் தயாரிக்கப்பட்டு மேடையேற்றப்பட்டமையும் குறிப்பிடத்தக்கது. செங்கை ஆழியான் எழுதிய “வாடைக் காற்று” நாடகத்தை திரைக் கதையாக எழுதியதின் முக்கிய பங்காளி என்ற பெருமையும் இவரையே சாரும்.

 தமிழ் பாணன்

தேர்தல்

பொழுது போக்கான

பேச்சுப் போட்டிக்கும்

கூட்டம் சேர்ப்பிற்கும்

வாக்குறுதி இறைப்பிற்கும்

வித விதமான

புகைப்பட காட்சிக்கும்

ஐந்தாடுக் கொருமுறை

கிடைக்கும்

சுதந்திரமான வாய்ப்பு

மாப்பிள்ளை

மாப்பிள்ளை

தென்னம் பிள்ளையாகி

எதையும் கொடுக்கத்

தயாரில்லை

ஆனால்

வாரி வாங்கத்

தயாராய் இருப்பதால்

அவர் மாப்பிள்ளை

 

மாப்பிள்ளை

பிழைப்பதற்கு

வரதட்சணை

கேட்கும் மா

அதனால்

மா-பிள்ளை

விண் மீன்

தூண்டில்

போட முடியாது

வலை

வீச முடியாது

புசித்துண்டு

பசியாற முடியாது

கைக்கெட்டாது

வாய்க்கும் எட்டாது

கடல் மீனல்ல

விண் மீன்

'கற்பகதரு' எனும் பனைவளம்

அறிமுகம்

ஆதி காலம்தொட்டு ‘கற்பகதரு’ என்று அழைக்கப்படும் ஒரு பயிரினம் தான் இந்த ‘பனை’ மரம். இது புல்லினத்தைச் சார்ந்த ஒரு பயிர் என்று ஆராட்சியாளர்கள் குறிப்பிடுகின்றனர். ஆயினும் நாம் பனை மரம் என்றே தற்போது பொதுவாக அழைத்து வருகின்றோம். இதன் மூலமாக பல்வேறு வகையான பயன்களை பெறக்கூடியதாக இருப்பதாலும் பனையை போல் வேறு பயிர்களோ மரங்களோ அதிக பயனைத் தராதமையாலும் இதனை ‘கற்பகதரு’ என்று அழைக்கும் வழக்கமும் உண்டு. எந்தவிதமான உள்ளீடுகளுமின்றி அதனுடைய ஆயுட் காலம் முழுவதும் பல்வேறு விதமான பயன்களை இது வழங்கிவருகிறது. ஆயுள் முடிந்த பின்னரும் இதனுடைய ஒவ்வொரு பாகமும் எந்தவிதமான கழிவுகளுமின்றி பெறுமதிமிக்க பயன்களை தர வல்ல ஒரு மரம் என்றால் அது மிகையாகாது. இதனுடைய ஆயுட்காலம் ஏறத்தாள 100 வருடங்கள் வரை இருப்பதோடு அதனைத் தாண்டியும் உயிர்வாழும் பனைகளும் உண்டு.